Hacıqabul rayonunda keçiriləcək buraxılış imtahanlarına hazırlıq işləri başa çatdırılmışdır.

Məlum olduğu kimi COVİD-19 pandemiyasına qarşı mübarizə şəraitində Azərbaycan Respublikasının Nazirlər Kabineti tərəfindən bir sıra kütləvi tədbirlər, o cümlədən Dövlət İmtahan Mərkəzi tərəfindən təşkil olunmuş buraxılış imtahanları bir müddət təxirə salınmışdır.

2019-2020-ci dərs ilində  Dövlət  İmtahan Mərkəzi tərəfindən  buraxılış imtahanlarının  keçirilməsi üçün  Hacıqabul rayonu üzrə  seçilmiş  imtahan mərkəzləri-Hacıqabul şəhər 1 nömrəli, 2 nömrəli, 8 nömrəli, 9 nömrəli, 10 nömrəli tam orta məktəblərin binaları buraxılış imtahanlarının keçirilməsinə tam hazırdır. Adı çəkilən məktəblərdə DİM tərəfindən Hacıqabul rayonu üzrə ümumi orta (9 illik) təhsil bazasından buraxılış, orta ixtisas təhsil müəssisələrinə sənəd vermiş məzunlar üçün kolleclərə qəbul imtahanı və Azərbaycan dili fənnindən imtahan keçiriləcəkdir. İmtahana hazırlıqla bağlı qeyd olunan məktəblərdə hər bir otağa düşən iştirakçı sayının sosial məsafə prinsipinə uyğun şəkildə tənzimlənməsi, imtahan otaqlarında sıra və yerlərin  nömrələnməsi, otaqların zəruri  avadanlıqlarla təchiz olunması, sanitar qovşaqlarının  axar su ilə, həmçinin  zəruri sanitar – gigiyenik vasitələrlə təchiz olunması ilə bağlı  bütün işlər başa çatdırılmış və  binalar “İmtahanlar zamanı koronavirus infeksiyasının (COVİD-19)  profilaktikasına dair metodiki göstərişlər”ə  uyğun olaraq dezinfeksiya olunmuşdur.

11.06.2020-ci il tarixində keçiriləcək buraxılış və orta ixtisas məktəblərinə qəbul imtahanında Hacıqabul rayonu üzrə  840 nəfər 9-cu sinif şagirdi iştirak edəcəkdir. Buraxılış və qəbul imtahanları ilə bağlı bütün iştirakçılara uğur arzulayır , imtahan günü özlərinin və başqalarının sağlamlığı üçün təhlükəsizlik qaydalarına ciddi əməl etməyi tövsiyyə edirik.