YAP Hacıqabul rayon təşkilatının sədri ictimaiyyətə təqdim olunub.

11.02.2022-ci il tarixində Hacıqabul rayon İcra Hakimiyyəti tərəfindən YAP Hacıqabul rayon təşkilatının yeni təyin olunmuş sədri Elnur Əmirəslanovun partiya aktivinə təqdimat tədbiri keçirildi. Tədbirdə Hacıqabul rayon İcra Hakimiyyətinin Başçısı Rüstəm Xəlilov, YAP rayon təşkilatının fəalları və ərazi partiya təşkilat sədrləri və idarə-müəsisə rəhbərləri iştirak edirdilər.

Hacıqabul rayon İcra Hakimiyyətinin Başçısı Rüstəm Xəlilov bildirdi ki, ölkəmizin ictimai-siyasi həyatında müstəsna xidmətləri olmuş, yarandığı ilk gündən müasirliyi, yeniliyi fəaliyyətinin əsas məqsədi kimi qarşıya qoyan, demokratik dəyərlərə söykənən, saf əqidəli insanları ətrafına toplayan Yeni Azərbaycan Partiyası yüz minlərin partiyasıdır. Zamanın tələbi ilə Heydər Əliyev dühasından yaranan YAP ölkə Prezidenti, Müzəffər Ali Baş Komandan İlham Əliyev cənablarının rəhbərliyi altında çox böyük tarixi yol keçərək Azərbaycanın daha sürətli inkişafı, müstəqil dövlət kimi daha güclü formalaşması üçün bir sıra çətinlikləri aradan qaldırmış, xalqın birlik simvoluna çevrilmişdir. Regionun ən böyük və ən güclü partiyası olan Yeni Azərbaycan Partiyasının bir parçası olan YAP Hacıqabul rayon təşkilatının gördüyü işləri yüksək qiymətləndirən rayon İcra Hakimiyyətinin Başçısı Rüstəm Xəlilov rayon təşkilatı qarşısında duran vəzifələrdən danışdı, yeni təyin olunmuş sədrə uğurlar arzuladı.

Tədbirdə çıxış edən YAP Hacıqabul rayon təşkilatının yeni təyin olunmuş sədri Elnur Əmirəslanov ona göstərilən böyük etimada görə Yeni Azərbaycan Partiyasının sədri cənab İlham Əliyevə və partiyanın rəhbərliyinə təşəkkürünü bildirdi və göstərilən etimadı doğrultmaq üçün var gücü ilə çalışacağını qeyd etdi.

Daha sonra YAP Hacıqabul rayon təşkilatı üzrə Hacıqabul rayon İcra Hakimiyyəti ərazi partiya təşkilatının hesabat-seçki yığıncağı keçirildi. İclasda ötən dövrdə görülmüş işlər müzakirə edildi və ərazi təşkilatının yeni sədr və müavini seçildi.