Hacıqabul rayonunda Ümummilli Lider Heydər Əliyevin anadan olmasının 103-cü ildönümünə həsr olunmuş konsert proqramı keçirildi.
XX əsr dünya siyasi tarixinin görkəmli dövlət xadimlərindən biri, müasir, müstəqil Azərbaycan dövlətinin memarı və qurucusu, Ümummilli Lider Heydər Əliyevin anadan olmasının 103-cü ildönümü münasibətilə respublikamızın hər yerində olduğu kimi, Hacıqabul rayonunda da silsilə tədbirlər keçirilmişdir. Azərbaycan xalqının taleyində mühüm rol oynamış dahi şəxsiyyətin əziz xatirəsi rayon sakinləri tərəfindən böyük ehtiramla yad olunmuşdur.
10 may 2026-cı il tarixində keçirilən tədbirdə Hacıqabul Rayon İcra Hakimiyyətinin başçısı Sevindik Hətəmov, hüquq-mühafizə orqanlarının rəhbərləri və əməkdaşları, idarə, müəssisə və təşkilatların kollektivləri, şəhid ailələri, qazilər, gənclər və rayon ictimaiyyətinin nümayəndələri iştirak edirdilər.
Tədbir iştirakçıları əvvəlcə Ulu Öndər Heydər Əliyevin abidəsi önünə gül dəstələri düzərək onun əziz xatirəsini ehtiramla andılar.
Sonra Heydər Əliyev Mərkəzində Ümummilli Lider Heydər Əliyevin anadan olmasının 103-cü ildönümünə həsr olunmuş “Xilaskar lider – Zəfərə aparan yol” adlı rəsmi tədbir başlandı.
Tədbirdə Azərbaycanın Dövlət Himni səsləndirildi, Ümummilli Lider Heydər Əliyevin və torpaqlarımızın azadlığı uğrunda canından keçmış qəhrəman şəhidlərimizin əziz xatirəsi bir dəqiqəlik sükutla yad olundu.
Tədbir iştirakçıları Ümummilli Lider Heydər Əliyevin həyat və fəaliyyətindən bəhs edən qısa videoçarxa tamaşa etdilər.
Tədbirdə çıxış edən Hacıqabul Rayon İcra Hakimiyyətinin başçısı Sevindik Hətəmov bildirdi ki, Ümummilli Lider Heydər Əliyev Azərbaycan dövlətçiliyinin möhkəmləndirilməsi, milli maraqların qorunması və xalqın rifahının yüksəldilməsi istiqamətində misilsiz xidmətlər göstərmişdir. Ulu Öndərin uzaqgörən siyasəti nəticəsində ölkəmiz çətin sınaqlardan uğurla çıxaraq sabitlik və inkişaf yoluna qədəm qoymuşdur. Rayon rəhbəri həmçinin vurğuladı ki, bu gün həmin siyasi kurs Azərbaycan Respublikasının Prezidenti cənab İlham Əliyev tərəfindən uğurla davam etdirilir, həyata keçirilən məqsədyönlü islahatlar nəticəsində Azərbaycan beynəlxalq aləmdə öz mövqeyini daha da gücləndirir və mühüm nailiyyətlər qazanır.
Daha sonra tədbirdə iştirak edən Yeni Azərbaycan Partiyası Hacıqabul rayon təşkilatının sədri İsmayıl İbrahimov, Rayon Ağsaqqallar Şurasının sədri Sahib Aslanov, təqaüddə olan təhsil işçisi, əməkdar müəllim Gülüstan Almazova, Padar qəsəbə tam orta məktəbin direktor müavini Gülnar Abdullayeva çıxış edərək Ümummilli Lider Heydər Əliyevin zəngin dövlətçilik irsindən, gənc nəslin vətənpərvərlik ruhunda formalaşmasında onun ideyalarının mühüm əhəmiyyətindən danışdılar. Natiqlər dahi rəhbərin Azərbaycanın sosial-iqtisadi inkişafı, milli-mənəvi dəyərlərin qorunması və dövlət müstəqilliyinin möhkəmləndirilməsi istiqamətində həyata keçirdiyi mühüm xidmətləri xüsusi qeyd edərək onun siyasi məktəbinin bu gün də ölkənin inkişaf strategiyasının əsasını təşkil etdiyini bildirdilər.
Tədbirdə o da vurğulandı ki, parlaq Zəfərimizə aparan yol Ümummilli Lider Heydər Əliyevin 1990-cı il də Naxçıvanda ilk dəfə üç rəngli bayrağımızı dövlət bayrağı kimi ucaltdığı gündən başlamışdır. Bu gün Şərqi Zəngəzur və Qarabağda aparılan geniş miqyaslı quruculuq işləri, “Böyük qayıdış” proqramı da məhz bu dahi şəxsiyyətin milli inkişaf strategiyasına söykənir.
Tədbirin sonunda rayon ictimaiyyətinin nümayəndələri Ümummilli Lider Heydər Əliyevin əziz xatirəsinin xalqımızın qəlbində daim yaşayacağını və onun dövlətçilik ənənələrinin gələcək nəsillər üçün mühüm örnək olaraq qalacağını bildirmişlər.
Daha sonra Heydər Əliyev parkında yerləşən açıq hava kinoteatrında geniş bayram konsert proqramı təşkil olunmuşdur. Tədbirdə Respublikanın tanınmış incəsənət nümayəndələri, əməkdar artistlər, Zakir Əliyev, Yaqut Babayeva, əməkdar mədəniyyət işçisi Azad Zamanov, muğam müsabiqəsinin qalibi Şəmsəddin İbrahimov, Vüqar Muradov, Zahidə Günəş və Zaur Yaqubov, Həsən Qibiyev, Xəqani Niftəliyev çıxış edərək rəngarəng musiqi nömrələri ilə iştirakçılara xoş ovqat bəxş etdilər.
