Hacıqabul şəhər 10 nömrəli tam orta məktəbində “8 Noyabr - Azərbaycanın Zəfər tarixi” adlı ədəbi-bədii kompozisiya keçirilmişdir.

03.11.2023-cü il tarixində Hacıqabul şəhər 10 nömrəli tam orta məktəbində “Zəfər günü”nə həsr olunmuş “8 Noyabr - Azərbaycanın Zəfər tarixi” adlı ədəbi-bədii kompozisiya keçirildi. Tədbir Azərbaycan Respublikasının dövlət himni ilə açıq elan edildi, torpaqlarımızın azadlığı uğrunda canından keçmiş qəhrəman oğullarımızın əziz xatirəsi 1 dəqiqəlik sükutla yad olundu.

Tədbirdə çıxış edən Hacıqabul Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Gülmirzə Süleymanov tariximizin parlaq səhifəsi olan şanlı qələbəmizin əldə olunmasında mühüm rol oynamış igid oğullarımızın şücaətindən söhbət açdı. Müzəffər Ali Baş Komandan cənab İlham Əliyevin böyük sərkərdəlik bacarığı və ordumuzun qəhrəmanlığı sayəsində 19-20 sentyabr 2023-cü il tarixində keçirilmiş lokal xarakterli antiterror əməliyyatlarının nəticəsi kimi suverenliyimizin Qarabağın bütün ərazisində bərqərar olunduğunu, azad olunmuş ərazilərimizdə dövlət bayrağımızın dalğalandığını vurğuladı.

Rayonumuzun şəhidləri Əlmirzə Mirzəyevin və Hümbət Yaqubovun valideynləri çıxış edərək övladlarının qəhrəmanlıq dolu döyüş yolundan söhbət açdılar, bildirdilər ki, torpaqlarımızın azadlığı uğrunda canını vermiş bütün şəhidlərimizin xatirəsini xalqımız daima əziz tutur. Doğma torpaqlarımızı düşmən tapdağından azad edərək bizə möhtəşəm qələbə bəxş etmiş oğullar gələcək nəsillər üçün qəhrəmanlıq nümunəsidirlər. 

Çıxış edən vətən müharibəsi iştirakçısı Sabir İmanov və Hacıqabul Rayon Təhsil  Sektorunun əməkdaşı Nəriman Ağayev qeyd etdilər ki, tarixə  qəhrəman oğullarımızın qanı ilə yazılmış zəfərimiz dövlətimizin regionda və beynəlxalq aləmdə öz layiqli yerini bir daha nümayiş etdirməklə yanaşı,  revanşist qüvvələrə qarşı barışmaz olacağını göstərdi.

Daha sonra şagirdlərin ifasında vətənpərvərlik mövzusunda mahnı və şeir nümunələri səsləndirildi.

Sonda Vətən müharibəsi və möhtəşəm qələbəmizə həsr olunmuş videoçarx nümayiş olundu.