Hacıqabulda kənd təsərrüfatı, balıqçılıq və akvakultura sahələrinin inkişafına dair Dövlət Proqramının icrasına həsr olunmuş müşavirə keçirildi.

05 iyun 2026-cı il tarixdə Hacıqabul Rayon İcra Hakimiyyətinin akt zalında “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafı üzrə 2026–2030-cu illər üçün Dövlət Proqramı”nın icrasının təmin edilməsi məqsədilə müşavirə keçirildi.

Tədbirdə rayonun aidiyyəti dövlət qurumlarının nümayəndələri, aqrar sahədə fəaliyyət göstərən müəssisələrin rəhbərləri, fermerlər və digər iştirakçılar iştirak etdilər.

Müşavirəni giriş sözü ilə açan Hacıqabul Rayon İcra Hakimiyyəti başçısının səlahiyyətlərini icra edən, İcra Hakimiyyəti başçısının birinci müavini Saleh Ələskərov Azərbaycan Respublikasının Prezidenti cənab İlham Əliyevin rəhbərliyi ilə kənd təsərrüfatının inkişafının ölkənin sosial-iqtisadi siyasətinin prioritet istiqamətlərindən biri kimi müəyyən olunduğunu bildirdi. O qeyd etdi ki, dövlət başçısının həyata keçirdiyi məqsədyönlü siyasət nəticəsində aqrar sahədə mühüm nailiyyətlər əldə olundu, kənd təsərrüfatı istehsalının genişləndirilməsi, ərzaq təhlükəsizliyinin möhkəmləndirilməsi və regionların inkişafı istiqamətində mühüm tədbirlər həyata keçirildi.

Saleh Ələskərov çıxışında vurğuladı ki, son illərdə ölkədə meliorasiya və irriqasiya sistemlərinin yenilənməsi, su təminatının yaxşılaşdırılması, aqrar sahəyə dövlət dəstəyinin gücləndirilməsi, subsidiya mexanizmlərinin təkmilləşdirilməsi və güzəştli kreditlərin verilməsi kənd təsərrüfatının inkişafına ciddi təkan verdi. Onun sözlərinə görə, həyata keçirilən tədbirlər nəticəsində kənd təsərrüfatında məhsuldarlıq yüksəldi, müasir texnologiyaların tətbiqi genişləndi və kənd əhalisinin məşğulluq imkanları artdı.

Çıxış zamanı bildirildi ki, Azərbaycan Respublikasının 2022–2026-cı illərdə sosial-iqtisadi inkişaf Strategiyasının icrası çərçivəsində hazırlanmış “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafı üzrə 2026–2030-cu illər üçün Dövlət Proqramı” aqrar sahənin yeni inkişaf mərhələsinə keçidini təmin etməyə xidmət etdi. Dövlət Proqramında aqrar sahədə dayanıqlı inkişafın təmin olunması, intensiv və rəqabətqabiliyyətli istehsal modelinin formalaşdırılması, dəyər zəncirlərinin inkişaf etdirilməsi, aqrar xidmətlərə çıxış imkanlarının genişləndirilməsi, balıqçılıq və akvakultura sahələrinin inkişaf etdirilməsi əsas hədəflər kimi müəyyən olundu.

Qeyd edildi ki, proqram çərçivəsində su və torpaq ehtiyatlarından səmərəli istifadə, aqrar təhsil və elmi-tədqiqat fəaliyyətinin gücləndirilməsi, innovativ texnologiyaların tətbiqi, aqrar-emal və logistika infrastrukturunun inkişafı, rəqəmsallaşmanın genişləndirilməsi, subsidiya və dövlət dəstəyi mexanizmlərinin təkmilləşdirilməsi istiqamətində mühüm tədbirlərin həyata keçirilməsi nəzərdə tutuldu.

Saleh Ələskərov diqqətə çatdırdı ki, qlobal ərzaq bazarlarında müşahidə olunan dəyişikliklər və təchizat zəncirlərində yaranan risklər daxili ərzaq təhlükəsizliyinin daha da gücləndirilməsini strateji zərurətə çevirdi. Bu baxımdan, aqrar sahədə məhsuldarlığın artırılması, yüksək əlavə dəyər yaradan emal sənayesinin inkişaf etdirilməsi, ixracyönümlü istehsalın təşviqi və fermerlərin müasir texnologiyalara çıxış imkanlarının genişləndirilməsi xüsusi əhəmiyyət kəsb etdi.

Çıxışda Hacıqabul rayonunda kənd təsərrüfatının inkişafı istiqamətində görülən işlərdən də bəhs olundu. Bildirildi ki, son illərdə rayonda əkinçilik və heyvandarlıq sahələrinin inkişafına xüsusi diqqət yetirildi, fermerlərin dövlət dəstəyi mexanizmlərindən istifadəsi təşviq edildi, kənd yerlərində məşğulluğun artırılması və əhalinin rifahının yüksəldilməsi istiqamətində müxtəlif layihələr uğurla icra olundu.

Eyni zamanda vurğulandı ki, yeni Dövlət Proqramının məqsədlərinə uyğun olaraq rayon ərazisində kənd təsərrüfatı məhsullarının istehsalı və emalının genişləndirilməsi, investisiyaların cəlb olunması və aqrar infrastrukturun daha da təkmilləşdirilməsi istiqamətində işlərin davam etdirilməsi nəzərdə tutuldu. Bildirildi ki, Dövlət Proqramının uğurlu icrası aqrar sektorun davamlı inkişafına, regionların sosial-iqtisadi tərəqqisinə və ölkənin ərzaq təminatının daha da gücləndirilməsinə mühüm töhfə verəcəkdir.

Daha sonra İcra Hakimiyyəti Başçısı Aparatının Ərazi-təşkilat məsələləri sektorunun müdiri Rəşad Abbasov rayon üzrə 2025-ci ildə kənd təsərrüfatı məhsulları ilə özünütəminetmə səviyyəsi barədə məruzə ilə çıxış etdi.

Müşavirədə Hacıqabul Dövlət Aqrar İnkişaf Mərkəzinin direktoru Elşən Quliyev, “Agro Dairy” MMC-nin əməliyyatlar üzrə rəhbəri Nahiq Ağayev və “Kənd Kimya” ASC-nin direktoru Xəzri İsgəndərov çıxış edərək Dövlət Proqramının icrası, aqrar sahənin inkişaf perspektivləri, müasir texnologiyaların tətbiqi, məhsuldarlığın artırılması və qarşıda duran vəzifələr barədə fikirlərini bölüşdülər.

Sonda qeyd olundu ki, Dövlət Proqramının uğurla icrası kənd təsərrüfatı, balıqçılıq və akvakultura sahələrinin davamlı inkişafına, ölkənin ərzaq təhlükəsizliyinin daha da möhkəmləndirilməsinə, kənd əhalisinin rifahının yüksəldilməsinə və regionların sosial-iqtisadi inkişafına mühüm töhfə verəcəkdir.